Ako’y nakikiisa sa ating mga kapatid na IDPs sa kanilang panawagan na makauwi na sa Ground Zero ng Marawi City. Ang sakit at pait na dala ng bangungot na alaala ng malagim na pangyayari noong Marawi siege ay hindi kailanman masosolusyonan hanggat hindi natin nabibigay ang kanilang hinaing.
Naniniwala ako na ang tunay na kapayapaan, kaunlaran at katahimikan na ating inaasam ay makakamit lamang kung ang iniinda ng ating mga kapatid na IDPs ay matuldokan na. Ito’y mangyayari lamang kung ang totoong rehabilitasyon ay ating makakamtan. Rehabilitasyon na ang matibay na pundasyon ay ang mga tao at hindi lamang ang mga magarbong kalsada, gusali at iba pang mga establisaminto. Totoong rehabilitasyon na siyang magpapahilom sa limang taong sugat na iniinda ng mga IDPs.
Ang aking opisina at ang Bangsamoro Government ay patuloy na magbibigay ng solusyon bilang tugon at suporta sa ninanais ng mga IDPs na kambalingan o permanenting pagpapabalik sa kanila sa Ground Zero.
Nawa’y gabayan tayo ni Allah at tulongan niya tayong maging instrumento sa pagkamit ng kapayapaan hindi lamang sa ating lugar kundi maging sa ating mga sarili.
